نصائح كيف تتعاملين مع زوجك

نصايح ازاى تتعاملى مع زوجك ابن قلبك
ممكن المخطوبه تشوف كمان اهو تعرف هتنيل ايه فى المرار الطافح
بصي يابنتي هنفرض انكم بتحبوا بعض يعني
هاقولك كام نصيحة تحطيهم حلقة في ودانك

والله والله والله اي راجل فالدنيا زي الطفل بالظبط
كلمة تجيبه وكلمة توديه  بالهدوء والحنية لو مجاش يبقي بالخناق عادى

1-احتوي الطفل اللي جواه  بالرفق واللين والمودة والمحبة  لو منفعش يبقي زي ابنك بردو وتحرميه من المصروف

2-حايليه لما يتنيل يزعل  ابو شكله فالارض

3-حاولي ترضيه وماتزعليهوش أينعم هو غبي بس معلش عشان خاطري انا

4-ماتنيمهوش زعلان منك هو اينعم المفروض يتفلق بس بردو انتي الكبيرة  بس لو ساق فيها ومرضيش يصالحك صدرى الوش الخشب اسبوع

5-اعمليله مفاجأة كل شوية .. هو مايستاهلش انا عارفة بكرشه ده بس معلش احنا متربيييين وطبعا هو كمان لازم يعملك غصب عنه اصلا

6-ماتتلكيكلوش عالواحدة سيبيه مش لازم كل ربع ساعة انت فين وعملت ايه خلاص هو بيزهق سيبيه شويه هتلاقي هو اللى كل شويه يكلمك وبيطمن عليكي

7-شوفي هو بيحب ايه واعمليهوله بعيد عن انه مابيطمرش فيه بس احنا ولاد ناس

8-عشان خاطري انا ابقي قوليله كلمتين حلوين في اخر اليوم هو بردو زي اخوكي قصدي بني ادم وبيحب يرتاح اخر اليوم ويختمها بيكي خليكي بنت اصول مش بومة زيه وادلعي يا ماما عشان خاطري انا اتدلعي الرجالة بيحبو البنت الدلوعة او المايصة بردو ميضرش

9-ماتقارنيهوش بأي شاب تاني عشان ماتهينيش رجولته هو اقرع وبكرش وداير بالفانلة على طول عارفة والله بس معلش اهو ضل راجل بردو

10- متأكليهوش توم.. هاييجى على دماغك والله خصوصا وهو بيشخر بالليل وفاتح بوقه زى التمساح

11- ماتطلبيش فلوس كتير .. راعي انه طالع عينه فالشغل ومتقلقيش كدا كدا هاتجيبيه عالحديدة وهاتشحتو عند باب السيده مع بعض بس واحده واحده عشان مايتخضش

12- ماتبصيش لجوز اختك جاب ايه لاختك والمنيل مجابلكيش انتي حاجة ماكفايه هو نفسه معاكي ابتلاء من ربنا وهتدخلي الجنة حدف

13- مافيش مانع لما يدخل ينام تسيبيه يرتاح ماتقلقيهوش هو تعبان وشقيان  بس اول مايصحي طلعي عينه وخلصي حقك اول بأول وممكن ترقديله واخر الاسبوع سففيه التراب بقا

14- قبل مايدخل البيت ممكن تحطي اي برفيوم حلو مالهوش ذنب يجيي يلاقي ريحتك سيرلاك وبامبرز  اديله هو العيل خليها تبقي ريحته هو

15- البسي لبس شيك وحلو قدامه بلاش جو الشحاتين اللي بتعمليه دا لا خليكي انيقه حتي لو هتاخدي مرتبه كله علي لبسك عادي مش هايقدر يتكلم ماهو كله رايحله فالاول والاخر

16- فوكي الكحكة ابوس ايد امك سيبي شعرك الرجاله بتحب الشعر السايب دا وان دخل فعينه ولا بوئو عادي يتعمي المهم تبقي انتي عملتي اللي عليكي

17- بطلي رغي عشان انا شخصيا بتعصب منه

18- ماتفتشيش في موبايله سيبيه هو اصلا مافيش كلبه هاتعبرو  وان عبرته هانجيب خبرهم هما الاتنين في خشبه واحده

19- ممكن لما يروح تكوني مجهزاله الحمام ياخد شاور دا في حاله انه مراضيكي فلازم تريحيه اما لو مزعلك هنجهز نفس الدوش بس هانحوط بدل المية والمعطر مية بجاااز
يلا بقا والبادى اظلم

شاهد أيضاً

علاج الشعر التالف بوصفات طبيعية

بمناسبة الصيف يمكن أن يسبب الكثير من التعرض لملوحة مياه البحر وحرارة الشمس الشديدة تلفًا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.