لعبة مفيدة جدا للاطفال

 

لعبة مفيدة جدا لنفسية أطفالنا
لأن
قدرة الطفل على التعبير عن مشاعره وأحاسيسه ..
واحدة من أهم الأسباب اللى تخليه ينشأ صحيح نفسيا  وشخصيته سليمه ..
وتساعد فى انه لما يوصل لفترة المراهقة تعدى بسلام بشكل كبير .

ولكن للأسف ..
التعبير عن المشاعر مش كل الأطفال بيعرفوا يعملوه ..

طب إزاى أساعد إبنى أنه يميز بين مشاعره ويقدر يعبر عنها
واحدة من أحلى الوسائل هى ..

لعبة المشاعر

لكن قبلها لازم نقول لكم على شوية حاجات مهمة جدا …

• أول حاجة لازم أكون مستمعة جيدة له ..
واظهر تعاطفى معاه  وماكونش ناقدة أبدا أو فى موضع الحكم عليه وعلى اللى بيقوله..
عشان اعطى له مساحة من الحرية يقدر يعبر عن اللى جواه ..
مع استخدام تعبيرات الوجه اللى بتدل على حسن الاستماع ..الابتسام والتأثر وهكذا..

• لازم يبقى فيه اتصال بصري
? يعنى عينه فى عينه ومركزة معاه مش مشغولة بحاجة فى ايدي وهو بيتكلم..

• خدى بالك من المشاعر اللى مستخبية ورا كلامه  ..واياااكي تتفزعي او تظهرى انزعاجك او تفاجؤك  ..

• قولي له اللى قاله تانى بأسلوبك عشان يعرف انك فهمتيه وكنتى مركزة معاه ..و اسأليه بعدها انا كدا فهمتك صح؟

• ومش معنى انك سمعتى له للآخر انك موافقة على كل اللى بيقوله لكن بعد ما يخلص خالص وتظهرى كل التعاطف وتعملى كل الحاجات اللى قولناها فوق اذن تقدري ساعتها توجههى بس بشكل غير مباشر  …
مثلا : انا آسفة لو كنت فهمتنى كدا بس انا فعلا مش قصدى اضايقك فى النقطة دى ..انا قصدى كذا وكذا وكذا…

تانى حاجة استخدام المشاعر فى القصص والحكايات  ….
والتركيز عليها يعنى واحنا بنقرأ قصة لازم نكرر ونأكد انه مثلا البطة فرحت اووى وكانت سعيدة  لما وصلت لخط النهاية فى السباق ..
أو النونو عيط جامد وكان زعلان لما لعبته اتكسرت  …وهكذا

وكمان الكروت اللى فيها تعبيرات الوجه من الحاجات اللى بتساعد جدااا وبداية من سن 3-5 سنين يقدر الطفل يميز تعبيرات الوجه والمشاعر اللى عليه…

وانهاردا هنقول لكم على لعبة جميلة جدااا

هى لعبة المشاعر ..

اعرضي علي طفلك :
• صورة لطفل بيبتسم
• صورة لطفل بيضحك
• صورة لطفل خائف
• صورة لطفل يبكي
• صورة لطفل غاضب
• صورة لطفل حزين
• صورة لطفل خجلان

وبعدين بعد ما يشوفها تسأليه :
الطفل دا بيشعر بإيه ؟
امتى بتشعر أنك زيه؟
و بتعمل ايه ساعتها؟

وساعديه يعبر ويتكلم ويحكي ..

السن الأكبر شوية من 8- 12 سنة ممكن تناسبهم لعبة أكبر شوية وهى عبارة عن مجموعة كروت فيها كلمات زى الفرح- الحزن – الغضب القلق……
ومعاها صورة بتعبر عنها
ونسأله ايه اللى ممكن يخليك تشعر بالشعور دا ؟

وفى الحقيقة مهم جدااا ان الأم والأب نفسهم يكونوا بيعبروا حلو عن مشاعرهم عشان أطفالهم يعبروا هم كمان …والكلام دا منذ الولادة ..

لازم يسمع أنا بحبك أوى
انا زعلانة عشان انت زعلان
يسمعوكي وانتى بتعبري لأهلك عن مشاعرك ..
وانتى بترحبي بضيوفك ..أهلا وسهلا دا انا سعيدة جدا بزيارتكم..
أنا قلقت عليك يا جدو
وهكذا…

عبروااا عن مشاعركم لأولادكم
وشجعوهم يعبروا هم كمااان

وماتنسوش تلعبوا لعبة المشاعر ..

هااا مين هيلعبها انهاردا ؟؟!

و مين عاوز العاب تانية مفيدة ؟!!

شاهد أيضاً

سبب اضطرابات النوم عند الاطفال

قالت الرابطة الألمانية لأطباء الأطفال والمراهقين إن صعوبات النوم تهاجم الأطفال المصابين باضطراب نقص الانتباه …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.